🔴ඉත්තෑ පවුල 3. 🔴 (වලත්ත පිරිමි.)
=======
“හාමුදුරුවනේ... හාමුදුරුවනේ.... හාමුදුරුවනේ......“
වේලාව, පස්වරු 1.00 පසු වූවා විය යුතුය. යාන්තම් ඇස් පියවීගෙන ආවා පමණි. බුදුන් වහන්සේ ද දිවාවිහරණය කළ සේක. මේ දායකයින් අපට එසේ කිරීමට ඉඩ නොදෙන හැටියක් අම්මපා... යැයි මට සිතුණි.😀🤭 තරුණත් නොවු මහලුත් නොවූ ගැහැණු කටහඩක් බෙරිහං දෙන ශබ්දය මට ඇසේ.
මම කාමරයෙන් එළියට බැස්සෙමි. අද මාසේ පොහොය දිනයකි. තවමත් අප විහාරස්ථානයේ පෝය හතරටම සිල් ගන්නා උපාසිකාවන් කීප දෙනෙක් ඇත. අද එවැනි පොහොය දිනයකි. අදත් 10-15 දෙනෙකු සිල් සමාදන් වී ඇත.
“ආ... මේ... අබේසිංහ නෝනානේ...“😊
අබේසිංහ නෝනා යැයි අප ගෞරවෙයන් ඇය ඇමතූවාත් ඇය මහලු නැත. ඇගේ ව්‍යාපාරය ද ඉතා දියුණු මට්ටමක පවතී. ඈ වනාහි ගමෙහි සිටිනා ධනවත් කාන්තාවන් අතරින් අයෙකි. එනමුත් දැන් වසර කීපයක සිට සතර පොහොයට සිල් සමාදන් වීමට තරම් ඇය නිදහස්ය. ඒ ඇගේ සැමියාගේ දායකත්වය නිසා යැයි සිතමි. විහාරස්ථානයේ ලොකු කුඩා සෑම හිමිනමක්ම හොඳින් හඳුනන ඇය, තරුණ විය ඉක්මවමින් සිටී.
“මේ අපේ මහත්තයාට පිරිත් නූලක් ගැටගහගන්න කියලා... හාමුදුරුවනේ...“
“අහ් පුළුවනි. ඉස්සරහා පැත්තෙන් එන්නකො එහෙනම්...“
“මහත්තයාට... අබේසිංහ නෝනා දකින්නැතුව වරුවක් වත් ඉන්න බැරිහැඩයිනේ...“😀
මා එසේ විහිළු ස්වරූපයෙන් කීවිට මහත්තයාගේ මුහුනු ලැජ්ජාවෙන් රතුවෙනු දුටුවෙමි.☺️☺️ ආගිය කතා ආදී විස්තර කතාකිරීමෙන් ස්වල්ප වේලාවකින් පසු මහත්තයා පිටවී ගියේ ය.
“දැන් නම් මහත්තයා ගොඩක් හැදිලා වාගේ...?
“එහෙමයි...“
දැන් ඔය කිරි තේ හදාගෙන ඇවිල්ලානේ හාමුදුරුවනේ ගිලන්පස වෙලාවට ගන්න කියලා... ගෙදර මම නැතුව පාළුයි කියන්නේ...“
එසේ පවසන විට ඇගේ මුහුණෙ කිසියම් ආඩම්බර පාටක් දිස්වුණි.😊
“නැතුව නැතුව... නෝනාගේ ඉවසීම හරිම ප්‍රසංශනීයයි...“
“මට උපදෙස් දෙන්න හොද අම්මෙක් හිටියා හාමුදුරුවනේ... නැත්තං මේ කසාදේ කටුගෑවිලා ගොඩක් කල්...“
“ගියමාසේ දවසක මම අසනීප වුනා හාමුදුරුවනේ... හොදටම...“ මේ මනුස්සයා ඇදගාවට වෙලා දවසක් හිටියා මිසක් shops එකටවත් ගියේ නෑ. ඔයා නැතුව මම මේ ලොකේ ජීවත් වෙන්න දන්නෑ මැණික... කීවාම මටත් ඇඩුනා...“
“මහත්තයා එහෙම වෙනස් වුනේ නෝනාගේ කැපකිරීම නිසා කියලයි මට හිතෙන්නේ... ගැහැනු ශරීරයෙන් දුර්වල වුනාට... මහ පුදුම ධෛර්යයක් ඇති අය“
“පිරිමි හරි මෝඩයි හාමුදුරුවනේ...“
“අවුරුදු 15-16 පැන්න ගමන් බලන්න. ගෑනු පස්සේ යන එකමයි උන්ගේ වැඩේ...“ විභාගයවත් හරියට පාස් කරගන්නේ කීයෙන් කීයද? ගෑනු, love කරලත්, විභාගත් හොදට කරගෙන හොද හොද රස්සාවලුත් කරනවා...“
“පිරිමි කසාද බැන්ඳත් ගෙදරින් එලියට බැස්ස වෙලාවේ ඉඳලා...
තවත් ගෑනියෙක් එක්ක බුදියන එක ගැනම හිතනවා මිසක් වෙනත් සිහියක් තියේ ද?
පාරට බැහැපු වෙලාවේ ඉදලා ඇස්වලට නිවනක් තියෙනවාද?
කඳ බඩ හොදට තියෙන එකියක් දැකපු ගමන්... පැණි හැලියට වැටිච්ච ඇඹලයො වාගේ ඒවා පස්සේ යනවා මිසක්...“🤭
“ඊටපස්සේ හවස් වෙනකොට ගිනිවතුර ටිකක් යාලුවො එක්ක එකතුවෙලා බඩට දාගන්නේ කොහොමද කියලයි කල්පනාව... ඒක ඉවර වෙච්චි ගමනුත් ආයෙත් බුදියන්න ගෑනියෙක් හොයනවා...“ 🙁
"ඔච්චරනේ හාමුදුරුවනේ පිරිමින්ගේ ජීවිතේ... උන්ගේ අංගජාතය කොහේ හරි ඔබන එකයි, අරක්කු ටිකක් ගැනයි හැරෙන්න වෙනත් කල්පනාවක් ඇති එක පිරිමියෙක් ඉන්නවාද මේ ගමේ...“
ඈ ආවේගශීලිව ප්‍රකාශ කරන වචන කාටවත් ඇහෙයිදොයි මට සිත් විය. ඊටත් වඩා පිරිමි ගැන කරන ප්‍රකාශවලින් මහත් වූ ලැජ්ජාවක් මට ද ඇති විය. 🙁
“කසාද බැන්දට, අතේ මුද්ද දාගෙන ඉන්නේ පිරිමි කීයෙන් කීයද හාමුදුරුවනේ... හොදට ඇඳලා පැලදලා එළියට බැස්සාම උන්ට අමතකයි උන් කසාද බැඳලා ද කියලා තියා තාත්තලාවත් ද කියලා...“ 🙁
“පිරිමි ගෙදරට ආපු වෙලාවට තාත්තලා වුනාට... උන්ට බස්වල යනකොට තමන් තාත්තලා නේද තමන්ටත් මේ වයසෙම දුවලා ඉන්නවා නේද කියලා අමතක වෙනවා...“ පිරිමින් සමහරවිට අවුරුදු 40 විතර පහුවෙනකල් ඇත්තටම තාත්තා කියන චරිතය අමතක කරලා ඉන්නවා ඇති කියලත් හිතෙනවා මට...“🙁
“ඔබවහන්සේ ඔය අධ්‍යාපන අමත්‍යාංශයක් වාගේ එකකට ගියාම බලන්න... ඒවාගේ පිරිමි කීයක් වැඩ ද කියලා...“ සමහර වෙලාවට සිකුරිටි ඇරෙන්න අනික් ඔක්කම ගෑනු... ගෑනු, ලමයි දෙතුන් දෙනෙකුත් හදාගෙන විභාගත් පාස් කරගෙන, ගෙවල් දොරවලුත් හදාගෙන රස්සාත් කරනවා හාමුදුරුවනේ... එතකල් පිරිමි ගෑනු පස්සේ හඹායනවා...“🙄
“ඔබවහන්සේට මේවා රහස් නෙවෙයිනේ... අපේ අම්මත් මේවා කියලා ඇතිනේ... අපේ මිනිහාගේ සේසතම හූරගන්නකම්... මොලේ පෑදුනේ නෑනේ...“😐
ඇගේ මව මා හට පැවසූ පරිදි, තම බෑනාට... අනියම් සබඳතා කීපයක් වත් තියෙන්නට ඇත. ඔහු සුරාවට ලොල්ව ව්‍යාපාරයද බංකොලොත් කරගෙන තිබුණි. පාප මිතුරන් ද තොගයක් ඇසුරු කළේ ලු. එහි වැඩ කළ තරුණියන් කීප දෙනෙක් සමඟ යහන්ගත වූ බව ආරංචි විනැයි පැවසුවාය. එම තරුණියන් මොහුගේ අන්තිම සතේ හිදෙන තුරු ඔහුව හප කෙරූ බව ද පැවසුවාය. අබේසිංහ නෝනා නඩුමග ගොස් මොහුව දික්කසාද කිරීමට ඔන්න මෙන්න තිබියදී, ඔහු පැමිණ දෙපතුල ලඟ වැදවැටුණු බව පැවසුවාය. මවගේ උපදෙස් පරිදි සමාව දී නැවත බාරගත් අතර සියලු ව්‍යාපාර අබේසිංහ නෝනා අතට ගෙන ඇත. 😢
“අපේ අම්මා නැත්තං ඔය මනුස්සයා මම අයින් කරලා ගොඩක් කල් හාමුදුරුවනේ...“
“මම නම් දික්කසාද වෙන්නමයි ලෑස්ති වෙලා හිටියේ... කොහේද මේ අපෙ අම්මා දුන්නෑනේ...
අම්මා කීවේ... ඕක උනත් ඔයා ආපහු බඳින්න නෙවෙයිනේ... ඕක ලෙහලා දැම්මොත් මේ දරුවාට තාත්තෙක් නැතිවෙනවා... ඌට මොකද කරන්න ඕනි කියන එක ඔයා තීරණය කරන්න. එත් මේ දරුවාට තාත්තෙක් නැති කරන්න එපා... ආයෙත් කසාදයක් බඳින්න අදහසක් නැත්තං... කියලා... මොනවා උනත් එයා දුවට ආදරෙන් හිටිය නිසා මම තීරණය අතෑරලා දැම්මා...“
“දැන් මට හිතෙනවා... අපට වඩා අපේ අම්මලාට පුදුම ඥානයක් තියෙනවා කියලා... එයා දුර දකින්න ඇති...“🤔
“ඊට කාලෙකට පස්සෙ, අපේ මහත්තයා... දවස් කීපයක්ම, මං ගාවට ඇවිදින් බල්ලෙක් වාගේ මගෙ දෙපතුළගාව වැදවැටුනා... මිනිහා කැඩිලා බිඳිලා විනාශවෙලා හිටියේ... නමුත් මට ඒක දැකලා සතුටක් හිතුන් නෑ හාමුදුරුවනේ. දුර්ලභව ලැබු පිරිමි ආත්මයක්, බල්ලෙක් වාගේ මගේ කකුල් දෙක ගාව වැටෙන්න ඕනි කියලා හිතන කෙනෙකුත් නෙවෙයිනේ හාමුදුරුවනේ මම. සමහර විට මම ඔබවහන්සේලා ඇසුරින් ලබලා ඉගෙනගත් මෛත්‍රී කරුණාව නිසා වෙන්නැති...“💪
“පස්සේ අපේ අම්මා හම්බෙලා... වැදලා සමාව අරගෙන තිබුණා... අම්මා කීවේ, පිරිමි කියන්නේ මෝඩයො... ඇගේ හයිය තියෙනකම් දුවන... අපි ඊට වඩා බුද්ධිමත් කොටසක්... අන්න අර ගෑනු දරුවට තාත්තෙක් විදිහටවත් ඉන්න දෙන්න... ඔයාට එපා වුනත් ... කියලා...“😐
“අපේ අම්මා... තාත්තට බොහොම ගුරු කරපු කෙනෙක් හාමුදුරුවනේ... තාත්තා වැඩිය කතා බහක් තිබුණ කෙනෙක් නොවෙයි... එත් අම්මට බොහොම ආදරෙන් හිටියා කියලා මම දන්නවා... අම්මට ඕනි දේවල් තමයි ඔක්කම ගෙදර සිද්ධවුනේ... අපි තාත්තට වඩා අම්මට බයයි... තාත්තා විශ්වාස කරා... අම්මාගේ තීරණ හරි කියලා... ඒ දෙන්නා අතර තිබ්බ ලොකුම අවබෝධය එක වෙන්න ඕනි... තාත්තගේ මරණින් පස්සේ... අම්මා ඇඩුවේ මාසයක් විතර ගිහිල්ලා... මට ඒක තේරුම් ගන්නත් අමාරුයි...“ මම හිතන්නේ අපේ අම්මා හරි වාසනාවන්තයි ඒ වාගේ ගැඹුරු අවබෝධයක් සහිත ස්වාමිපුරුෂයෙක් ලබන්න“
“දැන් නම් ඉතිං අපේ හාමුදුරුවනේ අවුරුදු 5කට වඩා ගෙවුනා... එත් මෙයා එදාන් පස්සේ ඉදන් ඉඳිකට්ටයි නූලයි වාගේ තමයි... පස්සෙන්මයි... හැබැයි එයා ගැන හිතේ තියෙන පිළිකුළ මැරෙනකම්ම තියේවි.“😢
“මම හිතන්නේ දැන් තියන්නේ නෝනාට ආදෙරටත් වඩා ගෞරවයක් ... නෝනාට බයයි ද මන්දා...“ මම කීවෙමි.
“එහෙම වෙන්න එපැයි හාමුදුරුවනේ... සාමන්‍ය ගෑනියෙක් කරන පරිත්‍යාගයක් නෙවෙයිනේ මම එයා වෙනුවෙන් කරේ. කොයි ගෑනිද මෙහෙම පිරිමි ආයෙත් භාරගන්නේ? එයා අද ගෞරවනීය ව්‍යාපාරිකයෙක්... නැන්දම්මා මගේ අත අල්ලාගෙන ඉඹිනවා මම එයාගේ ගෙදර ගියාම, එයාගේ පුතාව රැකලා දුන්නා කියලා. පව් ඒ අම්මා මොන තරම් ගින්දරක් ඉහුලුවාද මේ මෝඩ මිනිහා නිසා. 🙁
“මෝඩ පිරිමි හාමුදුරුවනේ මෝඩ පිරිමි... කඳබඩවල් දැක්ක ගමන් තමන්ට උතුම්ව ලැබිච්ච පුරුෂාත්මය අමතකවෙලා, උන්හිටිතැනුත් අමතක වෙන මෝඩ පිරිමි“
එසේ සිනාමුසු මුහුණින් පැවැසූ ඈ... මා හට නැමී නමස්කාර කොට...
“අවසරයි... මම අරපැත්තට යන්නම්“
යැයි කියා සන්සුන් ලීලාවෙන් ධර්මශාලාව දෙසට පියවර මැන්නාය. ඈ වනාහි ඉතා කලාතුරකින් දැකිය හැකි අපූරු ධෛර්යය සම්පන්න ගැහැණියක් යැයි මට සිතුණි. 😊
------------------------------------------------------------
🔴මේ සඳහා ඉත්තෑපවුල 3, ලෙස නම් කළේ, අසීරුවෙන් කටු ඇනගෙන රැකෙන පවුලක් නිසාය.
💎“මම නම් කොහොමවත් හිතන්නෑ හාමුදුරුවෝ feminist කියල. ඔබවහන්සේගේ ලිපි වල නිකම් ගැහැණු පිරිමින්ට යටත් වෙලා ඉන්නෝනේ වගේ තැන් ව්යංගයෙන් කියල තියෙනවනේ. feminism කියන්නේ කදුලු ගැන කතා කිරීමක් නෙමෙයි. Gender equality ගැන කතා කිරීමක් නේ ස්වාමීන් වහන්ස“💎
මේ තියෙන්නේ මා පසුගිය දවසක “හාමුදුරුවො feminist ද“ යනුවෙන් ලියු ලිපියට මගේ මිතුරියක් inbox හරහා කල චෝදනාවයි.
🔴 විෂයානුකූලව එසේ විය හැක. ඈ සදහන් කරන ජාතියේ දෙයක් නම් මා කරන්නේ නැත. ඇය තවම අවිවාහක නැත්තියකි. තරුණියකි. ඇගේ වචනයෙන්ම කියතොත් “දුක් කසාදයට වඩා - දික් කසාදය හොදයි“ යනුවෙන් ඇය දික්කසාදය අගය කරන අයෙකි. විවාහයට පෙරම තරුණියන්ගේ මනස එසේ දුෂණය වීම ගැන මා ඉතා කනගාටු වෙමි. මා එය දකින්නේ සමාජ ඛේදවාචකයක් ලෙසය.
🔴 විවාහයක් අර්ථසම්පන්නව ගෙවන හැටි ඉගැන්වෙන සුත්‍ර දේශනා 20-30 අතර ප්‍රමාණයක් සුත්‍ර පිටකයේ ඇත. මා උත්සහා කරන්නේ නොබිඳුනු ජිවිතයක් සඳහා යමක් කියන්නටය. නැතහොත් කාන්තාව පිරිමි හා සම යැයි කීමට නොවේ.
🔴 එහිදී මා විශ්වාස කරනු ලබන්නේ බිරිඳ යනු, chessboard එකක queen මෙන් ඉතා බලවත් නුවණැති ආභියෝගාත්මක චරිතයක් ලෙසත්, සැමියා... රැකගත යුතු බලයෙන් හීන අත්‍යාවශ්‍ය ඉත්තෙකු ලෙසත්ය. king lost වූ විට chess පරාදවෙයි.
🔴 එහෙයින් මා විශ්වාස කරනු ලබන්නේ පවුල් ජීවිත ගෙවන පිරිමි, ඉතා මෝඩ ශරීර බලයට දුවන නාඹර වස්සන් ලෙසය. ඔහුගේ මෝඩ ක්‍රියා ඉවසාගෙන ඉන්න යැයි බුද්ධිමත් බිරිඳට කී විට එය ෆෙමිනිස් දෘෂ්ටිය අනුව මගෙ යෙහෙළිය ඉහත කී අයුරින් දැකිය හැක. එහිද වරදක් නැත.
✔“නාහං, භික්‌ඛවෙ, අඤ්‌ඤං එකරූපම්‌පි සමනුපස්‌සාමි යං එවං පුරිසස්‌ස චිත්‌තං පරියාදාය තිට්‌ඨති යථයිදං, භික්‌ඛවෙ, ඉත්‌ථිරූපං“ (නීවරණ වග්ගය- අංගුත්තර නිකාය)
✔“මහණෙනි මම එකඳු දෙයක්වත් ලෝකයේ දකින්නේ නැත, පුරුෂයින්ගේ සිත දැඩිලෙස ග්‍රහණය කර ගත හැකි. කුමක් ද? ස්ත්‍රී රූපය තරම්“
🔴තථාගතයන් වහන්සේ එසේ පවසා ඇත්නම් මාගේ වචන ගැන කුමන කථා ද? අතිබහුරතයක් පුරුෂයො වනාහි ගැහැනුන්ගේ මළමූත්‍රවලට ඉතා ගිජු වූ ප්‍රේතයො කොටසකි. 😢
කාමරාගය යනු සොවාන් වුවත්, සකාදාගමී වුවත් පරාජය පත් නොවන ක්ලේශයක් බව ඔබලා දනු ඇතැයි සිතමි.
🔴එතෙකුදු වුවත් ගැහැනු අනාචාරයේ නොයා සුරැකී සිටින්නේ ඔවුන්ගේ ඉතා ගුණ යහපත් බව නිසාම නෙවෙයි. ගර්භාෂය නිසාය. දරුවන් නිසාය. පිරිමින්ට අවශ්‍යතා ඉටුකරගන්නට තම ශරීරය දීමට අවශ්‍ය නොවන නිසාය. ලෝකයේ රටවල් පාලනය කළ රැජිනියන් 24 පමණ ඇත. (Wikipedia කියවන්න.) ඈලා සියල්ලොම පුරුෂයින් 4සිට 80 දක්වා පරිහරණය කළ තැනැත්තියො වෙති. එහෙයින් බලය, ධනය ඉහළටම පැමිණි කළ කාන්තාවන් ද ගර්භාෂ බිය ඉක්මවා සිටී. ලංකාවේද එවැනි උදාහරණ ඇත.
🔴එහෙයින් මාගේ යෙහෙළිය කියනා පරිදි මම feminist කෙනෙකු නොවේ. එහෙමන්ම පුරුෂාධිපත්තයට අනුකූලව ලියන්නෙකුද නොවේ. ඔවුන්ගේ සියලු වැරදි ඉවසා සිටින්නට කියාද නොකියමි. පිරිමින්ගෙන් පහර කමින් වහලුන් ලෙස සිටිය යුතු යැයි ද නොකියමි. දාසී භාර්යාවන් වීමට ද ඇවශ්‍ය නැත. කිසිසේත්ම නැත.
එතකුදුවුවත් පවුල් බිඳීයාමට නොදී කාන්තාවන් පිළිබඳ විශ්වාසය තබා ඔවුන්ගේ ඉවසීම ගැන, ගුණවත්කම ගැන කතා කරන අයෙකු පමණි. ඇවිද යනවිට හමුවන මඩවලකින් පැනීමට, පසුපසට අඩියක් තබා වීර්යය ගන්නා, මේ බඳු ගැහැනු දැනටත් දහයකටත් වඩා මම දෑසින්ම දැක ඇත. ඔවුන් මහපුදුමාකාර චිත්ත ධෛර්යයක් ඇති ගැහැණු ලෙස මම දකිමි. ඊතලය පසුපසට අදින තරමට එහි වේගය තිරණය වේ. එබැවින් පසුබෑම හැමවිටම නරක නැත.💪
💎“පිරිමි වනාහි ලිංගිකත්වය වෙනම ද ආදරය වෙනම ද දකී. ගැහැනු, ලිංගිකත්වය ආදරය සමඟින් දකී.“ 💎
මේ උභතෝකෝටිකය තේරුම් ගත් කළ, බොහො පවුල් ගැටුම් තේරුම් ගත හැක.
මෙය කියවන මෝඩ පිරිමි, ස්වකීය සහජ නැඹුරුව පරදා, බුද්ධිමත් පිරිමියෙකු වන්නට ඉටාගන්නේ නම් මැනවි. එක ගැහැනියක්ගෙන් සෑහීමට පත් විය නොහැකි බවක් ඔබට හැඟේනම් කරුණා කොට විවාහ නොවී සිටින්න. කාන්තාවකට ගින්දර දීමෙන් වැලකී සිටින්න.😐
-------------------
(නම්ගම් සියල්ල මන:කල්පිතය. සත්‍ය කතා කිහිපයක් පදනම් කර ගත්, උපදේශනාත්මක අවශ්‍යතාවය පිණිස, අනන්‍යතාවය හඳුනා ගත නො හැකි සේ, නිර්මාණය කරන ලද කල්පිතයක් බව කරුණාවෙන් සලකන්න)
තවත් කෙනෙකුට කියවන්න share කරන්න.
තෙරුවන් සරණයි.🙏
(හෙරලි.)
